வெற்றிக் கவி

தமிழர் தம் தாய் மொழி;
தரணி புகழ் தமிழ் மொழி!
செந்தமிழ் நாட்டுச் சீலமொழி;
செழிப்புடனே வளர்ந்த மொழி!
பாண்டிய நாட்டின் தலை மொழி;
சங்கம் வைத்துத் தழைத்த மொழி!
புலவர் பலரைத் தந்த மொழி;
புரவலர் கேட்டுப் புகழ்ந்த மொழி!
பாரதியாரின் பாட்டு மொழி;
பாரத விடுதலை கீத மொழி!
வள்ளுவரால் சிறந்த மொழி;
திருக்குறளும் பிறந்த மொழி!
பஞ்ச காப்பியம் வந்த மொழி;
அணியாய் அவற்றை அணிந்த மொழி!
அகிலம் போற்றும் அன்பு மொழி;
ஆன்றோர் புகழும் அறிவு மொழி!
எல்லாப் புகழும் பெற்ற மொழி;
என்றும் வாழும் இனிய மொழி!
உலகுக் கெல்லாம் உயர் மொழி;
தமிழே எங்கள் உயிர் மொழி!
- வெற்றிவளவன்
            -oOo-

ராக்கெட் வேகம் அறிந்திடலாம்;

நினைவின் வேகம் யாரறிவார்?

ராக்கெட் செல்ல எல்லையுண்டு;

நினைவுகள் செல்ல ஏது எல்லை?

ராக்கெட் செலுத்த ஆணையுண்டு;

நினைவை செலுத்த ஆணையேது?

ராக்கெட் செல்லும் விண்ணில் மட்டும்;

நினைவோ செல்லா இடமேயில்லை!


- வெற்றிவளவன்
            -oOo-

தளதளவென ஒரு செடி தளிர்விடும் மலர்ச்செடி

வண்ண வண்ண பூக்களை வழங்கிடும் மலர்ச்செடி

சின்னப்பாப்பா சிகையிலே சின்ன முல்லை சிரிக்குதே

அன்புத் தங்கை தலையிலே அழகுரோஜா மணக்குதே

மல்லிகாவின் மலையிலே மல்லிகைப்பூ மலருதே

தண்ணீர்த் தடாகத்திலே தாமரைப்பூ தளிர்க்குதே

சாலையோரப் பூங்காவிலே சாமந்திப்பூ பூக்குதே

[தளதளவென...]

நல்ல பல பூக்களை நாளும் எங்கும் காணலாம்

வண்ணப் பூக்கள் காட்சியில் வானவில்லை காணலாம்

மணமளிக்கும் மலர்களே மகிழ்வளிக்கும் மனதிற்கும்

இறைவனுக்குச் சூட்டவே,

மணமக்கள் கழுத்திலே,

மறைந்தவர்கள் படத்திலே -

மாலையாகப் பூக்களே...

சிறந்த இடம் வகிக்குமே!

[தளதளவென...]


- வெற்றிவளவன்.
            -oOo-

உலகத்தில் உதித்த நாளில்
சிசுவாய் செவியில் கேட்ட மொழி

பூவுலக வாழ்வு தனில்
முதன் முதலாய் கேட்ட மொழி

தாலாட்டுப் பாடல் வழி
தாயின்குரல் கேட்ட மொழி

நாவசைத்து நல்லவற்றை
மழலையிலே கொஞ்சும் மொழி

கல்விக்கூடம் சென்றேதான்
அகரம் முதலாய் கற்ற மொழி

ஈடில்லாத சிறப்புகளை
பெற்றமொழி அன்னை மொழி

அன்னை தந்தை ஆசான் வழி
உள்ளந்தனில் உறைந்த மொழி

அயல்நாட்டு சிந்தனையும்
சிந்திக்கும் சிந்தை மொழி

கனவுதனை காண்பதுவும்
கற்றுணர்ந்த அன்னை மொழி

சினத்தினிலும் சிதறிவரும்
சிறப்புப் பெற்ற சீல மொழி

அன்புதனை உய்த்திடவே
கொஞ்சுகின்ற கிள்ளை மொழி

ஆபத்திலும் அலறுவதே
அன்று கற்ற அன்னை மொழி

ஆண்டவனை அழைப்பதுவும்
ஆய்ந்துணர்ந்த அறிவு மொழி

அனைத்தும் அந்த அன்புமொழி
அனைவருக்கும் ஒரே மொழி

எல்லாச் சிறப்பும் பெற்ற மொழி
அனைத்தும் அந்த அன்னை மொழி

- வெற்றிவளவன்
            -oOo-

ஔவைப் பிராட்டி



அமிழ்தின் உயர்ந்த பாடல்கள்

ஆத்திசூடி பாடல்கள்

இனிய சிறிய பாடல்கள்

ஈகை கற்பிக்கும் பாடல்கள்

உயர்வு மிக்க பாடல்கள்

ஊக்கம் உணர்த்தும் பாடல்கள்

எளிமை நல்கும் பாடல்கள்

ஏற்றம் மிகுந்த பாடல்கள்

ஐயம் தீர்க்கும் பாடல்கள்

ஒப்புயர் வற்ற பாடல்கள்

ஓதிடச் சிறந்த பாடல்கள்

ஔவை தந்த பாடல்கள்.


- வெற்றிவளவன்
           -oOo-